Category: Obraichean

Tha Bòrd na Gàidhlig a’ sireadh neach a thig a dh’obair còmhla rinn mar Oifigear Phlanaichean Cànain.

Tha planaichean Gàidhlig a’ comharrachadh nan dòighean anns am bi ùghdarrasan poblach a’ cruthachadh chothroman do dhaoine Gàidhlig a chleachdadh an lùib obair is seirbheisean nan ùghdarrasan poblach sin, agus bidh na planaichean aca a’ cur taic ri prìomhachasan a’ Phlana Cànain Nàiseanta Ghàidhlig. Bidh an t-oifigear a’ cuideachadh ùghdarrasan poblach nuair a tha iad a’ dealbh a’ chiad phlana aca agus nuair a bhios iad ag ùrachadh nam planaichean aca, mus tèid aonta foirmeil iarraidh bhon Bhòrd.

Tha e an urra ris an neach-dreuchd dèanamh cinnteach gun tèid prìomhachasan a’ Phlana Cànain Nàiseanta Ghàidhlig a chur an gnìomh tro na planaichean Gàidhlig aig na h-ùghdarrasan poblach, gu sònraichte le bhith a’ togail dàimhean làidir agus èifeachdach le oifigearan aig na h-ùghdarrasan poblach.

Prìomh thaobhan den dreuchd seo

1. A’ dèanamh cinnteach gu bheil gach plana Gàidhlig aontaichte a’ cur ri mar a thèid prìomhachasan a’ Phlana Cànain Nàiseanta Ghàidhlig a chur an sàs.
2. A’ dèanamh cinnteach gun coilean Bòrd na Gàidhlig na dleastanasan reachdail againn fo Achd na Gàidhlig (Alba) 2005 a thaobh a bhith ag iarraidh air ùghdarrasan poblach planaichean Gàidhlig ullachadh a’ cleachdadh An Stiùireadh Reachdail air Deasachadh Phlanaichean Gàidhlig.
3. A’ dèanamh cinnteach gun coilean Bòrd na Gàidhlig na dleastanasan reachdail againn fo Achd na Gàidhlig (Alba) 2005 a thaobh a bhith sgrùdadh mar a choileanas ùghdarrasan poblach na tha iad a’ gealltainn sna planaichean Gàidhlig aca.
4.  A’ togail dàimhean làidir agus èifeachdach leis ar luchd-ùidh ann an ùghdarrasan poblach tro chonaltradh cunbhalach – a’ toirt seachad comhairle agus fios-air-ais air cùisean co-cheangailte ri planaichean Ghàidhlig.
5. A’ gabhail uallach airson gach seòrsa obair rianachd co-cheangailte ri obair nam planaichean.
6. A’ measadh aithisgean dearcnachaidh, a cumail coinneamhan adhartas agus bidh agaibh ri tuilleadh fiosrachaidh agus/no fianais iarraidh ma bhios sin a dhìth.

Uairean obrach: Làn-ùine

Àite: Ri aontachadh

Cùmhnant: Maireannach

Ceann-là airson iarrtasan: Diaordain, 29mh an Cèitean 2025 aig 3f.

Lorgar barrachd fiosrachaidh mun dreachd agus mu mar a thèid iarrtas a chur a-steach air a shon an seo.

Tha Bòrd na Gàidhlig a’ sireadh neach a thig a’ dh’obair còmhla rinn mar Mhanaidsear Phròiseactan (Com-pàirteachaidh Coimhearsnachd). ‘S e amas na h-obrach a bhith a’ com-pàirteachadh agus a’ toirt taic do choimhearsnachdan leis an obair a tha iad a’ dèanamh gus lìbhrigeadh mu choinneamh nan raointean prìomhachais ann am Plana Corporra Bòrd na Gàidhlig. Bidh seo a’ gabhail a-steach com-pàirteachadh coimhearsnachd agus conaltradh le luchd-ùidh ionadail agus nàiseanta. Bidh stiùireadh agus measadh èifeachdach air pròiseas nam planaichean coimhearsnachd ionadail na phrìomh eileamaid den dreuchd seo.

Lorgar Tuairisgeul Obrach an seo. Leig fios gu corporra@gaidhlig.scot ma tha seo a dhìth oirbh ann an cruth eile.

Airson iarrtas a chur a-steach, lìon an Fhoirm-iarrtas Cosnaidh agus an Fhoirm-sgrùdaidh Co-ionannachd, a tha ri lorg gu h-ìosal, agus cur thugainn iad aig corporra@gaidhlig.scot.

Feumaidh iarrtasan a bhith a-staigh ro ochd uairean feasgar (8f) air Diardaoin 30mh am Faoilleach (30.01.25).

Thèid agallamhan a dhèanamh air loidhne uaireigin eadar Diluain 10mh agus Dihaoine 14mh an Gearran.